काठमाडौं – नेपाल राष्ट्र बैंकले ३४ अर्ब २० करोडको ट्रेजरी बिल जारी गर्ने भएको छ ।
राष्ट्र बैंकले २८, ९१,१८२ र ३६४ दिनको लागि ट्रेजरी बिल जारी गर्न लागेको हो । जेठ ०८ गते जारी हुने यस ट्रेजरी बिलका लागि अनलाइनमार्फत दिउँसो ३ बजे बोलकबोल हुनेछ ।
केन्द्रीय बैंकले २८ दिनको लागि १० अर्ब रुपैयाँ, ९१ दिनको लागि ४ अर्ब २३ करोड रुपैयाँको, १८२ दिनको लागि १२ अर्ब ४७ करोड रुपैयाँको र ३६४ दिनको लागि ७ अर्ब ५० करोड रुपैयाँको ट्रेजरी बिल जारी गर्ने लागेको हो ।
त्यस्तै २८ दिनको असार ५ गते , ९१ दिनको भदौ ५ गते , १८२ दिनको मंसिर ०५ गते र ३६४ दिनको २०८१ जेठ ०८ गते परिपक्व हुनेछ ।
ट्रेजरी बिल १ वा १ वर्षभन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो । सरकारलाई आवश्यक पर्ने अल्पकालीन अवधिको (बढीमा एक वर्ष) स्रोत जुटाउन यो बिल बिक्री गरिन्छ ।
सबै वर्गका बैंक तथा वित्तीय संस्था, संगठित संस्था तथा सर्वसाधारण नागरिक समेत ट्रेजरी बिलको बोलकबोलमा सहभागी हुन सक्नेछन् । बोलकबोलमा सबैभन्दा बढी मूल्य तोक्ने संस्थालाई पहिलो प्राथमिकतामा राखी क्रमैसँग आह्वान रकमसम्म ट्रेजरी बिलको बाँडफाँट हुने गर्दछ ।
