दसैं मनाउन घर आउँदा अनिवार्य १४ दिन क्वारेन्टिन

तनहुँ । तनहुँ जिल्ला संकट व्यवस्थापन केन्द्रको आज बसेको बैठकले दसैंमा घर आउने व्यक्तिले १४ दिनसम्म अनिवार्य क्वारेन्टिनमा बस्नपर्ने कोभिड-१९को जोखिमलाई ध्यानमा राखेर यस्तो निणर्य गरेको हो ।

नेपालीहरुको महान दसैंमा देश तथा विदेशबाट सर्वसाधारण आफनो जिल्ला फर्किने हुँदा कोरोना संक्रमणको जोखिम बढ्ने भएकाले त्यस्ता व्यक्तिको वडास्तरसम्मै तथ्याङ्क राख्ने र अनिवार्य क्वारेन्टिनमा बस्ने व्यवस्था मिलाउने निणर्य भएको छ । त्यसका लागि स्थानीयस्तरमा गठन भएका अनुगमन समितिलाई थप सक्रिय र प्रभावकारी बनाउने निणर्य भएको प्रमुख जिल्ला अधिकारी सागर आचार्यले जानकारी दिए ।

बैठकले प्रत्येक स्थानीय तहमा एम्बुलेन्सको आवश्यकता महसुस गर्दै त्यसको व्यवस्थापन गर्न स्थानीय तहलाई अनुरोध गरेको छ भने ब्यास नगरपालिका-५ कालीभञ्जन गण (ई) मा राखिएको जनज्योति ग्राम सेवाको एम्बुलेन्स सम्बन्धित संस्थालाई फिर्ता गर्ने निणर्य गरेको छ ।

आइसोलेसनमा रहेका सङ्क्रमितहरुको नेपाल सरकारको नीति वा अन्य कुनै कारणले भाइरस नेगेटिभ नआउँदै बहिर्गमन गर्दा घरपरिवारका सदस्यको रोहवरमा स्थानीय जनप्रतिनिधिको जिम्मा लगाएर मात्र बहिर्गमन गराउने निणर्य भएको छ ।