खुला भएको दुई दिनमै १ करोड ४७ लाख भन्दाबढी कित्ताका लागि आवेदन

काठमाडौं। असोज ११ गतेबाट बिक्रि  खुला गरिएको जनरल इन्स्योरेन्स कम्पनीको आईपीओमा दुई दिनमै मागभन्दा ५ दशमलव ३९ गुणा बढीको आवेदन परेको छ।

कम्पनीले प्रतिसेयर एक सय रुपैयाँ अंकित दरका ३० लाख कित्ता साधारण सेयर बिक्रीमा राखेको छ। जसमध्ये सर्वसाधारणका लागि २७ लाख ३० हजार कित्ता सेयर छुट्याइएको छ। सोमबार साँझ ५ बजेसम्ममा १ करोड ४७ लाख १५ हजार ८७० कित्ताका लागि ५ लाख १७ हजार ६ सय १३ हजार जनाबाट आवेदन परिसकेको कम्पनीको बिक्री प्रबन्धक एआईबीएल एस क्यापिटलले जानकारी दिएको छ।

कम्पनीले एक लाख २० हजार कित्ता सेयर आफ्ना कर्मचारीका लागि र एक लाख ५० हजार कित्ता सामूहिक लगानी कोषको लागि छुट्याइएको छ।

कम्पनीको सेयरमा न्यूनतम १० देखि अधिकतम १० हजार कित्तासम्मका लागि आवेदन दिन सकिनेछ। आवेदन अवधि छिटोमा असोज १४ सम्म तोकिएको छ।

आर्थिक वर्ष २०७६/७७ मा १०४.०२ रुपैयाँ प्रतिसेयर नेटवर्थ रहेको जनरल इन्स्योरेन्सले चालु आवभित्र यसलाई ११५.१९ रुपैयाँ पुर्याउने प्रक्षेपण गरेको छ।