काठमाडाैं । माया खोला हाइड्रोपावर कम्पनी लिमिटेडले वैदेशिक रोजगारीमा रहेका नेपाली नागरिकका लागिे बिक्री खुला गरेको साधारण शेयरको आवेदन दिने आज (पुस ८ गते) अन्तिम दिन हो ।
वैदेशिक रोजगारीमा रहेका नेपाली नागरिकहरुले आज बैंकिङ समयसम्म आवेदन दिन सक्नेछन् । निष्कासित शेयरमा आयोजना प्रभावित स्थानीयले आवेदन दिन पुस १७ गतेसम्मका लागि म्याद थप गरिएको छ । यस अघि आयोजना प्रभावित स्थानीयले पुस ८ गतेसम्म आवेदन दिन सक्ने भनिएको थियो ।
कम्पनीले आफ्नो जारी पूँजी १ अर्बको ३४ प्रतिशतले हुने ३४ करोड मूल्य बराबरको कूल ३४ लाख कित्ता साधारण शेयरमध्ये आयोजना प्रभावित स्थानीय बासिन्दाका लागि कूल १० लाख कित्ता शेयर छुट्याएको छ ।
त्यस्तै बाँकी सर्वसाधारणमा निष्कासन गरिन २४ लाख कित्ता मध्ये १० प्रतिशत हुन आउने २ लाख ४० हजार कित्ता शेयर वैदेशिक रोजगारीमा रहेकाहरुका लागि निष्कासन गर्न लागिएको कम्पनीले जनाएको छ ।
कम्पनीले आयोजना प्रभावित क्षेत्रका स्थानीयलाई ६ लाख कित्ता शेयर आयोजना अति प्रभावित क्षेत्र सङ्खुवासभाको चैनपुर नगरपालिका वडा नं. ८ र ९, धर्मदेवी नपा वडा नं. ३, ४ र ५ तथा मादी नपा वडा नं. ४ र ६ का बासिन्दाका लागि छुट्याएको हो ।
त्यस्तै आयोजना अति प्रभावित क्षेत्र बाहेक सङ्खुवासभाको अन्य क्षेत्रमा बसोबास गर्नेका ४ लाख कित्ता शेयर निष्कासन गरिने छ ।
न्यूनतम १० कित्तादेखि अधिकतम १ लाख कित्ता खरिदका लागि आवेदन दिन सक्ने छन् । त्यस्तै वैदेशिक रोजगारीमा रहेकाहरुले अधिकतम ५० हजार कित्ता शेयर खरिदका लागि आवेदन दिन सक्नेछन् ।
