काठमाडौंं । भन्सार विभागले सार्वजनिक गरेको तथ्याङ्क अनुसार चालु आर्थिक वर्ष २०७८/७९ को ११ महिनामा नेपालको व्यापार घाटा १५ खर्ब ७७ अर्ब ३८ करोड पुगेको छ ।
गत आर्थिक वर्षको यही अवधिमा १२ खर्ब ६२ अर्ब ११ करोड बराबर व्यापार घाटा थियाे । नेपालको अर्थतन्त्र ओरालो लाग्ने क्रममा गत यही अवधिको तुलनामा चालु आवमा २५ प्रतिशतले व्यापार घाटा बढेको हो ।
गत आर्थिक वर्षको ११ महिनमा नेपालले १५ खर्ब ४ अर्ब ६१ करोड १८ लाख बराबरको वैदेशिक व्यापार गरेको थियो भने चालु आर्थिक बर्षको ११ महिनाको अवधिमा नेपालले १९ खर्ब ४९ अर्ब बराबरको वैदेशिक व्यापार गरेकाे छ । गत आर्थिक वर्षको तुलनामा कुल वैदेशिक व्यापार २९.५ प्रतिशतले बढको छ ।
साढे १७ खर्बको आयात
विभागको तथ्याङ्क अनुसार चालु आर्थिक वर्ष २०७८/७९ को ११ महिनाको अवधिमा १७ खर्ब ६३ अर्ब २२ करोड बराबरको विदेशी वस्तुको आयात भएको हो ।गत आर्थिक वर्षकोे सोही अवधिमा नेपालले १३ खर्ब ८३ अर्ब ३६ करोड बराबरको आयात गरेको थियो । गत आवको तुलनामा चालु आवमा २७.५ प्रतिशतले आयातमा वृद्धि भएको छ ।
निर्यात १ खर्ब ८५ अर्ब ८३
यसैगरी निर्यातमा गत आवको तुलनामा चालु आवमा ५३.३ प्रतिशतले वृद्धि भएको छ । नेपालले चालु आर्थिक वर्षको साउन देखि जेठ महिना सम्म १ खर्ब ८५ अर्ब ८३ करोड बराबरको स्वदेशी वस्तुको निर्यात भएको छ । गत आवको यही अवधिमा १ खर्ब २१ अर्ब २५ करोड बराबरको निर्यात भएको थियो ।
पेट्रोलियम पदार्थको आयात बढी
यो आर्थिक वर्षको ११ महिनामा पेट्रोलियम पदार्थको आयातमा मात्र २ खर्ब ६७ अर्ब २९ करोड ९८ लाख ४३ हजार नेपाली रुपैयाँ बहिरिएको छ ।जसमा सबैभन्दा धेरै डिजेल आयातमा एक खर्ब ४५ अर्ब २१ करोड ९३ लाख ५० हजार, पेट्रोलमा ६२ अर्ब ९१ करोड ९८ लाख ४६ हजार र एलपी ग्यासको आयातमा ५९ अर्ब १६ करोड ६ लाख ४७ हजार बढी बाहिरिएको छ ।
नेपालमा यस चालु आर्थिक बर्षको ११ महिनामा पाम आयल ५३ अर्ब २५ करोड ५१ लाख ६२ हजार बराबरको, स्टिल आइरन ४८ अर्ब ७८ करोड ४६ लाख ८७ हजार बराबरको र मोबाइल ३८ अर्ब ६ करोड ६९ लाख ८७ हजार बढीका आयात भएको छ ।
यस्तै, एघार महिनाको अवधिमा नेपालबाट एक खर्ब ९० करोड ८६ लाख ३२ हजार बढीको सोयाबिन तेल, ६६ अर्ब ८६ करोड ८९ लाख ७२ हजार बढीको पाम आयलको निर्यात भएको छ ।
