सरकारले भोलि देखि सहुलियत मूल्यमा खसी-बोका बिक्रि गर्ने

काठमाडौं । खाद्य व्यवस्था तथा व्यापार कम्पनीले दसैंका लागि सोमबारदेखि सहुलियत मूल्यमा खसी-बोका बिक्री गर्ने भएको छ ।

कम्पनीको थापाथलीस्थित बिक्री केन्द्रबाट सोमबार बिहान ८ बजेदेखि खसी-बोका बिक्री सुरु हुने कम्पनीले जानकारी दिएको छ ।

कम्पनीको आइतबार बसेको बैठकले जिउँदो खसी तथा बोका प्रतिकिलो ५६० रुपैयाँ तोकेको छ । जसमा प्रतिकिलो १० रुपैयाँ छुट दिएर ५ सय ५० रुपैयाँमा खसी-बोका बिक्री गरिने निणर्य भएको हो ।

आइतबार साँझसम्म मकवानपुर र दाङबाट ४०५ वटा खसी-बोका थापाथली बिक्री केन्द्रमा आइपुगेको कम्पनीले जनाएको छ । खसी-बोकाको जिउँदो मूल्य समान भएको र सो मूल्य गत वर्ष जतिकै भएको कम्पनीले जनाएको छ ।