वैदेशिक रोजगारी र उच्च शिक्षा हासिल गर्न जानेलाई  बढ्याे विदेशी मुद्रा सटही सुविधा

काठमाडौं । नेपाल राष्ट्र बैंकले वैदेशिक रोजगारीमा र उच्च शिक्षा हासिल गर्न जानेलाई विदेशी मुद्रा सटही सुविधा बढाएको छ ।

राष्ट्र बैंकले पुस १२ गते एक परिपत्र जारी गर्दै विदेशी विनिमय कारोबार गर्न इजाजत पत्र प्राप्त निकायहरूलाई जारी परिपत्र-२०७९ संशोधन / परिमार्जन गर्दै यस्तो व्यवस्था ल्याएको हो ।

जापान, दक्षिण कोरिया, युरोप महादेश, संयुक्त राज्य अमेरिका, क्यानाडा जानेको हकमाः अधिकतम अमेरिकी डलर ५०० अन्य मुलुक जानेको हकमाः अधिकतम अमेरिकी डलर २०० सुविधा उपलब्ध गराउने व्यवस्था गरेको छ ।

यसअघि नेपाल सरकारको सम्बन्धित निकायबाट श्रम स्वीकृति लिई वैदेशिक रोजगारीमा जाने नेपाली नागरिकलाई राहदानी वापत अधिकतम अमेरिकी डलर २०० सम्म मात्र सटही सुविधा थियो ।

त्यस्तै, उच्च शिक्षा हासिल गर्न अमेरिका,अष्ट्रेलिया लगायत युरोपेली देशमा जाने विद्यार्थीले अमेरिकी डलर १२ हजार सम्मको सटही सुविधा पाउने व्यवस्था ल्याएको छ । यस अघि यस्तो सुविधा अमेरिकी डलर १० हजार सम्म थियो ।