सात दिन भित्र कोभिड विमितको विवरण बुझाउन स्वास्थ्य मन्त्रालयको निर्देशन

काठमाडौं । स्वास्थ्य तथा जनसंख्या मन्त्रालयमा कोरोना बिमाको दावी रकम प्रमाणीकरण गर्ने क्रममा प्रयोगशालाबाट प्राप्त विवरण मध्ये कतिपय संक्रमण पुष्टि नभएको र परीक्षण मिति नमिलेको विवरण पाइएको छ ।

मन्त्रालयले फागुन १० गते सार्वजनिक सूचना जारी गरी कोभिड-१९ परीक्षण गर्न अनुमति पाएका प्रयोगशालाहरुलाई विमितहरुको विवरण तोकिएको ढाँचामा पठाउन अनुरोध गरेको छ ।

अबको ७ दिनभित्रमा तोकिएको ढाँचामा विवरण उपलब्ध नभएमा कोरोना बिमाको दावी प्रमाणीकरण अयोग्य रहने र यसबाट विमित व्यक्तिलाई पर्ने कठिनाईप्रति सम्बन्धित प्रयोगशाला नै जिम्मेवार हुने मन्त्रालयले सूचना माफर्त जानकारी गराएको छ।

मन्त्रालयमा प्राप्त भएको १८ हजार विवरण भएकोमध्ये १५ हजार भन्दा बढी प्रमाणीकरण भैसकेको छ । यस्तै, कोरोना बिमाको विमितहरुले विभिन्न संस्थामा अनावश्यक दौडधुप गर्न परेकोमा ध्यानाकर्षण भएको मन्त्रालयले जनाएको छ। त्यसकारण विमामा भैरहेको काम प्रक्रिया बारे स्पष्टरुपमा जानकारी दिन मन्त्रालयले सम्बन्धित निकायलाई अनुरोध गरेको छ ।