भेरी अस्पतालको कोभिड-१९ वार्डमा कार्यगत स्वास्थ्यकर्मीमाथी आंक्रमण

नेपालगन्ज । बाँकेको भेरी अस्पतालको कोभिड-१९ वार्डमा कार्यगत चिकित्सकमाथि बिरामीका आफन्तहरुले कुटपिट गरेका छन् ।

उक्त अस्पतालको कोभिड-१९ वार्डको हल नं १ मा भर्ना भएका दाङका डिल्लीबहादुर रावतको अवस्था गम्भीर भएर मृत्यु भएपछि उनका आफन्तहरुले चिकित्सकको लापरवाहीले बिरामीको मृत्यु भएको भन्दै कुटपिट गरेका हुन् ।

मृत्यु भएका बिरामीका आफन्तहरुले आक्रमण गर्न सुरु गरेपछि स्टाफ नर्स र चिकित्सक शौचालयको सिसाको झ्याल फोडेर भागेका थिए । कुटपिटमा परेका चिकित्सक र स्वास्थ्यकर्मीलाई सामान्य चोटपटक लागे पनि स्वास्थ्य अवस्थामा भने सामान्य नै छ ।

प्रहरीले उक्त घटनामा संलग्न तीन जनालाई पक्राउ गरेको जनाएको छ । प्रहरी नियन्त्रणमा रहेका तीन जनामध्ये दुई जना मृतक रावतका भाइ र एकजना छोरा रहेको खुलेको छ । स्वास्थ्यकर्मीले सुरक्षाको माग गरेपछि राति देखि नै भेरी अस्पतालमा थप २० जना प्रहरीको टोली खटाइएको छ ।