स्वास्थ्य अवस्था गम्भीर भएपछि डोनाल्ड ट्रम्प अस्पताल भर्ना

काठमाडौं । शुक्रवार कोरोना संक्रमण पुष्टि भएका अमेरिकी राष्ट्रपति डोनाल्ड ट्रम्पको स्वास्थ्य गम्भीर बनेपछि अस्पताल भर्ना भएका छन् ।
ट्रम्पलाई वाल्टर रिड नेशनल मिलिट्री मेडिकल सेन्टरमा लगिएको ह्वाइट हाउसले सूचना जारी गरी जानकारी दिएको छ ।

 उनीसहित उनकी श्रीमति मेलानिया ट्रम्पमा पनि कोरोना संक्रमण पुष्टि भएको छ । अमेरिकी राष्ट्रपति चुनावका लागि सक्रिय रहेका ट्रम्पमा कोरोना संक्रमण पुष्टि भएपछि उनी होम आइसोलेसनमा बसेका अवस्थामा स्वास्थ्य बिग्रिएपछि उनलाई अस्पताल लगिएको हो ।

ट्रम्पलाई उनको विशेष हेलिकोप्टर मरिन-१ बाट मेडिकल सेन्टर लगिएको थियो । यसअघि ट्रम्पले एक ट्वीट गरी आफूलाई र आफ्नी पत्नी मेलानियालाई कोरोना संक्रमण पुष्टि भएको जानकारी दिएका थिए ।

अस्पताल प्रस्थान गर्नुअघि ट्रम्पले आफूहरुको स्वास्थ्य लाभको कामना गर्नेहरुलाई धन्यवाद ज्ञापन गरेका छन् । राष्ट्रपति पदको चुनावका प्रतिस्पर्धी जो बाइडेन लगायतले ट्रम्पको शीघ्र स्वास्थ्यलाभको कामना गरेका छन् ।