परराष्ट्रमन्त्री ज्ञवाली र भारतीय समकक्षी एस जयशंकरबीच टेलिफोन संवाद

काठमाडौं । परराष्ट्रमन्त्री प्रदीप ज्ञवाली र भारतीय विदेशमन्त्री एस जयशंकरबीच टेलिफोन संवाद भएको छ ।

नेपालले भारतीय कम्पनी सेरम इन्स्टिच्युट अफ इण्डियासँग किनेको १० लाख डोज खोप आउन ढिलाइ भइरहेका बेला दुई देशका परराष्ट्रमन्त्रीबीच भएको संवादलाई अर्थपूणर् रुपमा हेरिएको छ ।

दुबै  परराष्ट्रमन्त्रीले कोभिड-१९ महामारीविरुद्धको लडाइँमा थप सहयोगको अभिवृद्धि गर्नेसहित खोपको आपूर्तिबारे विचारविमर्श गरेकाे परराष्ट्र मन्त्रालयले जनाएको छ ।

परराष्ट्रमन्त्री ज्ञवालीले कोरोना महामारीविरुद्धको नेपालको लडाइँमा १० लाख डोज कोभिशिल्ड खोप उपलब्ध गराएकामा भारत सरकारप्रति हार्दिक आभार व्यक्त गरेका छन् ।
साथै मन्त्री ज्ञवालीले कोभिडको उच्च जोखिममा परेका नेपालीलाई दोस्रो डोज खोप लगाउन आवश्यक पर्ने थप खोपको आपूर्तिका निम्ति सहजीकरण गर्न भारतका विदेश मन्त्रीसँग अनुरोध गरेको  मन्त्रालयद्वारा जारी  गरेकाे विज्ञप्तिमा उल्लेख छ ।

त्यस्तै भारतीय विदेश मन्त्रीले खोप आपूर्तिसहित महामारीबाट पार पाउन नेपालको प्रयासमा भारतको निरन्तर साथ र सहयोग रहने आश्वासन दिएका छन् ।